Actividade no Centro Pedro Murias

O luns 20 de decembro de 2010 os alumnos de bioloxía e xeoloxía de 1º de Bacharelato fixemos unha visita ao centro de formación agroforestal Pedro Murias, para facer un queixo tipo Arzúa Ulloa, que precisa unha dobre fermentación.

En primeiro lugar disfrazámonos poñendo batas, gorros, guantes e catiuscas brancas. A continuación entramos na queixería e vertemos 100 litros de leite da granxa ecolóxica do propio centro, nun pasteurizador de fluxo continuo que somete o leite a unha temperatura de 75ºC durante 15 segundos para despois arrefrialo repentinamente. Posteriormente, xa co leite na cuba, engadímoslle uns cultivos de organismos mesófilos (Streptococos lactis e Streptococos cremoris) que transforman a lactosa do leite en ácido láctico. Deixámolos actuar durante 45 min e mentres agasaiáronnos cun aperitivo.

Volvemos facer os controis de Ph, temperatura e engadir o “cuajo” para provocar a coagulación do leite durante 35 min. Neste tempo recibimos unha clase teórica sobre o proceso de elaboración do queixo e a continuación fomos realizando todos os pasos: corte, axitación, delactosado, lavado da pasta, salado, desorado, preprensado, moldeado e prensado final.

Foi unha actividade moi interesante, pasámolo ben e descubrimos que ser un bo mestre queixeiro non é tan doado como poidera parecer. Como este tipo de queixo necesita un tempo de maduración mínimo de 6 días, á volta do Nadal, terémolo como regalo de Reis e ó mellor hasta compartimos....