Bo Nadal e feliz 2008!.

Borja Pardo Iglesias

A educación, capaz de transformar a mulleres e homes en seres humanos,

hanos de levar a ese Nadal que todos desexamos.

Felices Festas e bo ano 2008!.

Charla de Gonzalo Moure

Gonzalo Moure habló en el salón de actos del I.E.S. Porta da Auga de su novela La noche del Risón. Ante un público muy numeroso de alumnos de la ESO, el autor ofreció una serie de retazos del proceso creativo de la obra. Los asistentes tuvieron ocasión de realizar el camino inverso al que se sigue cuando se lee una novela y conocer de primera mano sus mimbres narrativos. Gonzalo Moure explicó a unos inquietos estudiantes que un escritor no saca las obras de la nada, como un conejo de la chistera, sino más bien que cada una de las obras que escribe es un fragmento de su biografía, de su trayectoria vital.
En el coloquio hubo preguntas muy variadas (la geografía existencial de autor es vastísima) sobre temas diversos. Los alumnos mostraron un gran interés por conocer un poco más a un escritor que los cautivó hasta el extremo de concederle una parte de su recreo. Al final hubo lugar incluso para la emoción cuando el autor recordó que no es más generoso el que más da sino el que para dar ha de privarse de algo que necesita. La idea de Juana de traer a Gonzalo fue, una vez más, un éxito.

Un novo proxecto de normalización lingüística

Co proxecto IMPULSO Á NORMALIZACIÓN DO GALEGO NO SECTOR DE SERVIZOS XURÍDICOS (NOTARÍAS, AVOGACÍAS, XESTIÓN DE PREDIOS,...) E NO ASOCIACIONISMO EN XERAL DO CONCELLO DE RIBADEO, o IES Porta da Auga acadou un novo premio para proxectos de innovación lingüística en lingua galega, na convocatoria conxunta da Dirección Xeral de Ordenación e Innovación Educativa e a Secretaría Xeral de Política Lingüística.

A iniciativa ten como obxectivo facilitarlles aos profesionais do sector todo un conxunto de documentos en galego de uso frecuente, como diversos tipos de contratos (arrendamento, compravenda, constitución de sociedades, ...) e outros documentos, listos para o seu uso. O que se pretende é favorecer o aumento da presenza do galego, nun ámbito no que está practicamente ausente.

Outro dos destinatarios serían as numerosas e variadas asociacións existentes no concello de Ribadeo: de veciños, culturais, deportivas, comunidades de montes, etc. Ofreceránselles diversos modelos de documentación e formularios (actas, solicitudes, reclamacións, recursos, bases de datos de socios, etc.), ademais de asesoramento lingüístico.

En calquera caso, preténdese que os servizos que se ofrezan se axusten o mellor posíbel ás necesidades e peticións dos interesados, xa que o que se persegue é ofrecer algo útil e que se utilice na práctica.

O proxecto está coordinado polo profesor Anxo Martínez, e nel traballarán seis docentes máis e arredor de sesenta alumnos, inscritos de xeito voluntario.
Na iniciativa tamén intervirá o Concello de Ribadeo a través do Servizo de Normalización Lingüística, asesorando e colaborando na posta en contacto do centro cos colectivos aos que se enfoca o proxecto.

Charla de COGAMI

O mércores 19 de decembro, o alumnado de 2º de bacharelato e de ciclos formativos correspondentes as familias de administración, automoción e electricidade, dos centros IES e CIFP Porta da Auga, participou nunha charla-coloquio impartida por un membro da Confederación Galega de Minusválidos (COGAMI) e un mozo afectado por unha tetraplexía. O obxectivo da charla foi o de concienciar aos rapaces da necesidade de evitar riscos innecesarios que puidesen ter como consecuencia unha lesión medular (condución temeraria, non observancia das medidas de seguridade nas empresas, mergullos inadecuados no mar, nos ríos ou nas piscinas) así como o de informarlles do cambio radical no estilo de vida que implica o feito de estar prostrado nunha cadeira de rodas.

Radares

O día 13 de decembro firmouse no Concello o convenio de colaboración co IES Porta da Auga no proxecto “Radares”, unha iniciativa pola que se creará un espazo de intermediación entre o alumnado do IES e o Centro de Información Xuvenil do Concello.
No instituto dous alumnos atenderán as demandas dos seus compañeiros, serán os redares do centro en todo o referente á información xuvenil procedente do Concello. Ademais axudarán a resolver conflitos entre os compañeiros.
Esta iniciativa é a primeira vez que se desenvolve nunha localidade como Ribadeo, ata agora tan só se fixo en cidades como Lugo, Coruña e Zaragoza.

Noite de Reis. Ou o que queirades.

O pasado venres o alumnado de primeiro de bacharelato asistiu á representación teatral do Centro Dramático Galego da obra de W. Shakespeare “Noite de reis.Ou o que queirades”, dirixida por Quico Cadaval.
A representación tivo lugar no Auditorio Hernán Naval de Ribadeo e forma parte da programación cultural que o Concello de Ribadeo ofrece aos centros educativos da Vila.

(Información sobre a obra)

Un escenario incomparable para unha experierncia inolvidable

É a frase coa cal os alumnos/as do COLEGIO F.P. S. LUIGI (S. Donà di Piave-Venezia) resume este novo proxecto europeo, levado a cabo do 10/11 ata 14/12 do 2007, que lles permitiu descubrir un anaco da nosa Galicia e mais concretamente de Ribadeo e o seu municipio.

Un proxecto que consistiu no coñecemento do territorio e ter unha experiencia laboral traballando en empresas ribadenses.

Para eles, o mesmo que para os nosos alumnos cando van a Italia, a lingua é unha barreira que se ben ó principio parece insalvable, logo, pouco a pouco, superados os primeiros temores e grazas ás persoas que atopamos polo noso camiño, fai que a experiencia, anque breve, sexa satisfactoria pola calurosa acollida e a extraordinaria dispoñibilidade demostrada polas empresas receptoras.

En definitiva a experiencia resulta sempre moi enriquecedora.

Unha vez máis como profesora, titora e coordinadora da F.C.T. do IES PORTA DA AUGA de Ribadeo quero dar as grazas a todas as empresas que colaboraron neste proxecto e tamén a aquelas que desde sempre estiveron aí, “codo con codo”, con nosos alumnos/as de Administrativo. Sen elas non sería posible, nin onte, nin hoxe nin mañá realizar a Formación en Centros de Traballo (FCT) o que se coñece popularmente como prácticas nas empresas.

Margarita Vilaseca Sánchez

(Resumen da experiencia do Colexio San Luigi)

Declaración Universal dos Dereitos Humanos

Onte, 10 de decembro, conmemorábase a Declaración Universal dos Dereitos Humanos. Aínda que esta nova se escriba tarde, nunca o é demasiado para botar unha ollada a esta Declaración Universal que cumpriu xa 59 anos.
¿Cántos terán que pasar para que xa non sexa necesario lembralos?.
No seguinte enlace pódense repasar: http://www.orion.coop/IndexA2C.html

Cleses sen fume

“Clases sen fume” é un concurso europeo para mozos e mozas con edades comprendidas entre os 12 e 14 anos.
Ten como finalidade que non comecen a fumar ou ben, se xa o fixeron, que deixen o tabaco antes de que se enganchen. Baséase na responsabilidade e confianza mutua.
Durante o curso realizarán unha serie de actividades que aumentarán os seus coñecementos sobre o tema do tabaquismo ou tempo que se divertirán e poderán gañar importantes premios.
Os compoñentes dos grupos participantes, os dous primeiros e segundos de ESO, comprométense a non fumar durante polo menos seis meses, (dende novembro ata abril), incluíndo as fins de semana e períodos de vacacións e a axudar aos compañeiros e compañeiras se ven que teñen tentación de abandonar. Ademais, baixo a coordinación do titor/a realizarán actividades de prevención do tabaquismo.
Os premios consisten nunha viaxe ao parque temático da Warner Bros en Madrid, estadía nun albergue con programa de multiaventura e unha viaxe a unha capital europea.
Esta campaña está promovida polas Consellerías de Educación e Sanidade. Pódese atopar máis información en:
http://dxsp.sergas.es/
http://www.edu.xunta.es/valora

Charla "Paraísos Naturales"

Diversos alumnos e alumnas do centro asistiron hoxe a unha charla titulada “Paraísos Naturales” a cargo do periodista galego Emilio Varela.
Viaxeiro incansable e gran naturalista, Emilio Varela xa estivera connosco fai 2 anos para falarnos sobre unha expedición á Antártida. Na actualidade, entre outras actividades, colabora co proxecto Climántica, esta rematando un proxecto sobre Auroras Boreais, e trata por tódolos medios de sensibilizarnos a todos sobre os problemas medioambientais insistindo fundamentalmente na perda de biodiversoidade e no cambio climático.

Galiciencia

No cambio de mes, catro alumnos de 2ºBT, José Manuel, Joaquín, Iván e Arturo, xunto con Antonio, pasaron tres días en Ourense expoñendo dous traballos orixinados na XII Feira da Ciencia e Tecnoloxía do IES Porta da Auga: 'Auga e maicena, sólido ou líquido?', e 'A cantidade de sal na ría de Ribadeo'.
Levaron un premio: foi a caseta máis concorrida da mostra. Pero non foi o único: ó premio dos visitantes houbo que engadirlles a viaxe e estancia de tres días en Ourense (podedes preguntarlles como o pasaron), o poder asistir a unha mostra científica onde había traballos premiados a nivel internacional, feitos por estudantes de secundaria convivindo con outros traballos con ideas xa patentadas, entre varias outras posibilidades. Pouco desto quedará nas crónicas en xeral, por iso estas letras (o premio non se fixo efectivo nos premios finais).Ata aquí, unha historia dun éxito. Pero sería case mentir non engadir algunha cousa máis.A primeira, que a posibilidade da viaxe ofrecéuselle primeiro que á xente de 2BT á de 1ºBT, e de xeito sorprendente, ninguén se animou á participación. O profesor correspondente, o mesmo que está a facer a crónica, quedouse confundido. Como é posible que nun grupo de xente ninguén (por unha ou outra razón) se anime a facer gratis unha viaxe como esta? Coido que antes de lean isto xa haberá xente que se teña arrepentido.
A segunda, que os traballos presentados non son os seus propios, senón os de outra xente: Joaquín, Adrián e David, alumnos que xa non están no centro (e que non sabiamos que podían ter ido aínda que non estiveran no centro...), e Jesús e Adrián (outro Adrián) que non quixeron ir. É dicir, que houbo unha complementariedade e colaboración en parte involuntaria pero que deixa ver ás claras que o estudo (e a vida) vai mellor se todos poñen un pouco de si.
A terceira, púidose comparar que ás nosas investigacións e proxecto en xeral aínda lles queda abondo percorrido para igualarse (por termo medio) ó termo medio dunha exposición deste estilo. Non é unha bronca. É unha constatación e un acicate para facer as cousas pensando na investigación máis que na difusión. Na creación máis que na copia e reprodución, por interesantes que estas sexan (pero tendo conta tamén que ambas son necesarias, e en canto á difusión, si estamos a nivel).
Como comentario final, o manter visita tras visita o stand máis cheo que ningún outro, o atraer a prensa e televisión, non foi algo que xurdiu da nada, senón un traballo que aproveitou a circunstancia (o proxecto presentado) para sacar a tallada dunha pequena inmersión na ciencia a traveso dunha rareza. Algo que se conseguiu e no que amosaron ser mestres en particular José Manuel, pero tamén Joaquín, Iván e Arturo.
Como resume, non nos podemos perder a Galiciencia do próximo ano, e intentarase que a parte dos presentadores de proxectos, poda ir máis xente como excursión a un conxunto de actividades que ademáis da propia exposición incluía presentacións con títulos como a física imposible e a maxia da química, charlas demostrativas como a de Adolf Castel e concursos, pero onde o máis interesante foi ver a xente mesmo da ESO presentando traballos de relevancia científica feitos dende o principio por si mesmos.
... E faltaría o resume lúdico, con diversos compoñentes, pero eso mellor noutros foros.

Antonio Gregorio Montes
http://ribadeando.blogspot.com/

http://feirasdeciencia.wikispaces.com/

Concurso de postais de Nadal

Está convocado un concurso para elexir a postal de Nadal que se utilizará para felicitar as xa próximas festas de Nadal. As bases son as seguintes:

1. Poderán participar tódolos alumnos e alumnas matriculados no centro dende 1º de ESO ata 2º de Bacharelato e Ciclos Formativos.
2. O formato da postal será Din-A5 (medio folio) cun grosor mínimo de 125 g/m2.
3. A técnica a empregar será libre (en color ou en branco e negro).
4. A tarxeta gañadora recibirá un premio de 50 € en vales de compra e empregarase como imaxe para a postal navideña do IES Porta da Auga.
5. O xurado estará composto polo profesorado do departamento de plástica e membros do equipo directivo.
6. A data límite para entregar postais é o 4 de decembro.

Unha feira de ciencia en outono

No IES estamos afeitos a celebrar unha feira da ciencia e tecnoloxía cada ano, arredor do mes de abril, a “feira de abril”. Este curso no ano da ciencia 2007, por primeira volta, celebrouse asemade unha segunda feira, a feira de outono, dentro das actividades da Semana da Ciencia en Galicia, patrocinada mediante Diverciencia pola Dir. Xeral de I + D + i da Xunta de Galicia.
Entre as cousas que houbo que facer como complemento á feira debido ó patrocinio estivo unha enquisa que, entre outros resultados, deu unha apreciación media de 8,4 sobre 10 á hora de valorar se gustou ós visitantes ou non. En xeral, as valoracións foron positivas, como por exemplo no caso da organización, resaltando o aspecto de atención ós visitantes.
Pero non só de enquisas vive a feira. Quen estivo alí puido disfrutar e sobre todo comprender máis algúns fenómenos explicables pola ciencia. E aumentar o seu interese pola explicación das cousas, vendo que calquera cousiña pode ser explicable: só hai que procurarlle a explicación (cousa que moitas veces non é tan sinxela).
O montaxe da exposición e o desmontaxe foi rápido. Máis lento foi a realización de cada unha das experiencias e construcións que alí se puideron ver. Aínda que nalgún caso pode parecer moi sinxelo (poñamos, a demostración da influencia da tensión superficial na auga soportable por unha moeda), leva traballo detrás de preparación, procura de información, e realización. O saber din que non ocupa lugar, pero alomenos necesita tempo.

Cinensino

O pasado martes 13 o alumnado de 1º e 2º de ESO asistiu á proxección da primeira das películas previstas na programación do programa de prevención de drogodependencias “CINENSINO” para este curso.
Este programa utiliza como soporte base o cinema para profundizar e traballar en diferentes temas de interese relacionados coa prevención do consumo de drogas.
Neste primeiro pase proxectouse o filme “Alex Rider: Operación Stormbreaker” (93 min) (Geoffrey Sax, Reino Unido, estreada en España en 2007) na que un adolescente, Alex Rider, normal e corrente vive co seu tío, ata que este morre en circunstancias misteriosas. Alex descobre que o seu tío era en realidade un espía e que foi asasinado. Pouco a pouco, este colexial dáse conta de que o seu tío, ao fomentar os seus hobbys, preparoulle a conciencia para unha carreira na espionaxe. Lingüista, mergullador, escalador, experto en artes marciais e excelente tirador, Alex ten tódalas cualidades necesarias para ser o perfecto espía adolescente. Empuxado polas circunstancias, Alex enléase na súa primeira misión.
O obxectivo xeral que se persegue nesta primeira unidade didáctica, na que o alumnado traballará nas horas de titoría, é chegar a comprender que o consumo de substancias na adolescencia pode ser expresión de anticonvencionalismos e actitudes rupturistas que entrañan certos riscos.

Concurso "As mates molan"

Hoxe arranca o concurso de resolución de problemas de matemáticas recreativas a través desta web convocado polo departamento de matemáticas baixo o título “As mates molan” dirixido a tódolos alumnos e alumnas de ESO da Mariña.
A primeira fase do concurso consistirá na resolución de boletíns de exercicios que se irán publicando na web do departamento, http://www.demates.es/, onde se pode atopar toda a información sobre o mesmo. A esta primeira fase, que rematará o día 27 de marzo coa publicación das puntuacións totais na mesma, seguiralle a fase presencial á que accederán os concursantes que acaden unha maior puntuación. Desenvolverase no IES e consistirá nunha única proba de resolución de exercicios similares aos dos boletíns publicados na web, terá lugar no mes de abril e poñerá fin ao concurso.
Os/as dous/dúas concursantes que acaden maior puntuación na proba presencial recibirán un diploma acreditativo, 100 € en vales de compra para o primeiro e un MP4 para o segundo.
Animádevos a participar!. AS MATES MOLAN!.

Presentación da feira de ciencia, edición outono.

O día 8 de novembro tivo lugar a presentación da segunda parte da Feira da Ciencia deste ano. Participaron nela Alfonso Piñeiro, Mº Jesús Besteiro e Antonio Gregorio, ilustrando en conxunto o marco no que se inscribe, a semana europea da ciencia neste ano que tamén é o ano da ciencia, a colaboración entre a Asociación Cultural Xerfa e o IES, a subvención por parte da Dir. Xeral de Investigación, Desenvolvemento e Innovación da Xunta de Galicia, etc. Incidiuse tamén en aspectos concretos da feira, dende a exposición de cogomelos, adiantada unha semana respecto ó resto de presentacións por motivos de axenda do IES, á nominación doutras experiencias que terán lugar no IES o 14 e 15 de novembro, en horario de tarde (16 a 18h).
Fíxose fincapé na autoría dos alumnos do IES e en que son os principais aproveitados no obxectivo declarado desta actividade, estender a comprensión e o interese pola ciencia. Son eles tamén os que xa amosaron en diversas ocasións experiencias e montaxes da feira no día da ciencia na rúa de A Coruña e o farán a finais de mes en Galiciencia (da que haberá información máis puntual)

Emilio Calatayud Pérez

Xuíz de menores de Malaga que saltou aos medios de comunicación por ditar sentencias exemplares, inxeniosas e innovadoras como condenas a aprender a ler e escribir, sacar o graduado escolar, etc...
Nos seguintes enlaces pódense ver dous vídeos que corresponden a unha das súas intervencións en coloquios sobre educación.
As súas opinións sobre tódalas problemáticas en cuestión de menores, a claridade expositiva e a visión práctica non deixan a ninguén indiferente. Non ten pelos na lingua e non deixa torre en pé.
Merece a pena velos e reflexionar.

Primeira parte (vídeo 1)

Segunda parte (vídeo 2)

Saída ás setas

O martes 6 de outubro, alumnos de 4º ESO acompañados polos profesores José Carlos, Montse e Susi participaron nunha excursión xa tradicional no centro: unha saída ás setas. O lugar elexido foi o mesmo ca estes últimos anos: o Campo do Oso, en Mondoñedo, e a finalidade da saída era recoller exemplares dos cogumelos máis representativos da zona para despois poder amosalos a tódolos interesados nunha exposición.
Realmente, aínda que este outono está sendo especialmente seco e polo tanto bastante pobre en setas, nas tres horas de paseo polo monte recollemos unha variedade considerable de exemplares. De volta ao instituto, fomos xantar e despois quedamos para proceder á clasificación e montaxe da exposición que poderá ser visitada ata o venres ás 12. Nela encontraredes máis de 40 especies distintas entre as que figuran as máis comúns da mariña tanto de zonas altas coma de prados. Todas teñen a súa tarxeta co nome científico, vulgar así como o seu interesse culinario ou toxicidade se é o caso. Así, podemos encontrar dende comestibles como Lactarius deliciosus, Boletus edulis, Lepiota procera, Coprinus comatus, Cantharellus lutescens, Agrocibe aegerita, Hydnum repandum... ata tóxicas como Amanita pantherina, Cortinarius sanguineus, Hypholoma fasciculare... pasando por outras sen interese culinario como Russulas ou Boletus bovinus. Dende algunhas tan típicas como a seta dos ananitos (Amanita muscaria) ou o peido de lobo (Lycoperdon molle) ata outras que moita xente non asocia como fungos como Pisolithus tinctorius (empregada antiguamnete para facer tintes), Sparassis crispa (vulgarmente coñecida como coliflor), unha boa representación de leñosas ( Polyporus, Coriolus versicolor, Fomes fomentarius, Ganoderma aplanatum...) e mesmo algunha que ningún ano tivemos coma por exemplo Chorosplenium aeruginosum.
Polo tanto, animamos a tódolos interesados a dar unha volta pola exposición. Consideramos que o obxectivo da actividade que é achegar o alumnado ao mundo da micoloxía está conseguido, e esperamos poder seguir realizandoa nos anos vindeiros.

Fin de semana no camiño de Santiago

A pasada fin de semana (19-21 de Outubro), alumnos de 1º de Bacharelato, de 4º da ESO , algún de 3º, e un do ciclo medio de Administrativo, todos eles participantes (cando estudaron 3º ESO) no " PROXECTO TERRA", interviron por primeira vez nun dos chamados intercambios territoriais organizados por dito proxecto, en concreto o do "Camiño de Santiago do Cebreiro a Samos".
O obxectivo principal destas actividades é o de contribuír a mellorar o coñecemento que os escolares de Galicia deben ter da nosa arquitectura e da nosa identidade territorial.
O primeiro día, o venres, chegamos ao Cebreiro e alí ,en espera dun guía que ía vir dende A Coruña, visitamos a Palloza-Museo, a Igrexa e o conxunto arquitectónico do Cebreiro. Cando chegou Juan, que asi se chamaba o noso guía, comemos e despois volvemos ao autobús, que nos deixou en Fonfría e a partir deste punto comezamos a baixar andando cara a Triacastela (uns 9 Kms). Por certo, Juan que era profesor de Filosofía en Monelos non nos abandonou nos tres días, incluso durmía onde durmíamos nós; leva máis de 20 anos visitando esa zona e coñece a tódolos veciños. Nun aparte levounos a Miguel e a mín e mais a dous alumnos que manifestaron interese, B. López e Diego, a ver uns cochos deses de raza celta (un deles parecía unha vaca de grande que era), unhas casas rurais onde Borja quedou en ir de Lúa de mel e a casa dun tal Vázquez Queipo que foi o inventor da táboa de logaritmos. A tal casa, máis ben caserón, está en ruínas pero acaba de mercala Patrimonio, vaise gastar en restaurala 500 millóns das antigas pesetas, vaina explotar durante 50 anos, e despois devolveralla aos seus actuais donos, o Mosteiro de Samos. En Triacastela pasamos a noite, nun albergue só para nós........¡podédesvos imaxinar a noite!.............
O segundo día, sábado, seguimos en Triascastela toda a mañá, fomos ver un obradoiro artesanal de tecido, onde unha artesá estivo ensinándonos a traballar co tear, e como se facía o urdido. Despois de comer iniciamos o traxecto ata Samos (10 Km). Juan ía saíndonos ao camiño de cando en vez co seu coche para que non nos perdéramos. En Samos durmimos no Mosteiro ¡de película de medo!. Parece que o “Proxecto Terra” ofrécelles aos monxes amañar algo ese cuarto que dispoñen para os grupos de estudantes, adecentándoo coma un albergue, pero eles néganse a cambiar nada e xa vedes na foto como son eses “habitáculos”................. Ao final, todos na cama e comeza de novo a esmorga, despois dunha bronca de Miguel acabamos por durmir ata que sobre as 6 da mañá comezaron a soar os móbiles dos amigos/as de Ribadeo que estaban a rematar a noite do Sábado.
O domingo era o último día, despois de almorzar nun bar, un monxe ensinounos o Mosteiro, os claustros, a biblioteca, a igrexa; todo estaba bastante mellor que onde durmiramos............. Chegamos a Ribadeo á hora de xantar.
Foi unha bonita experiencia, os alumnos portáronse de marabilla, agás polas noites, pero iso é cousa da idade. O problema é que tanto Miguel como a que escribe empezan ir maiores para pasar dúas noites sen durmir como Deus manda, así que solicitamos profesores substitutos para estes menesteres. Sen embargo, antes que envellezamos de todo, abrimos lista para ir o 9-10 de maio a Ferrol-Fragas do Eume, unha visita ao casco urbano de Ferrol (hai que manexarse cada un co seu plano), un paseo en barco pola ría, coñecer o castelo de S. Felipe e por suposto facer sendeirismo polas fragas do Eume ata o Mosteiro de Caaveiro, tamén se durmirá nun albergue, pero desta vez unha soa noite, ANIMÁDEVOS, precisamos mínimo 25 alumnos/as, trátase de coñecer a nosa identidade territorial, como di o anuncio: EXERZAMOS DE GALEGOS.

Un novo premio en innovación en normalización lingüística

Por segundo ano consecutivo este centro obtivo un premio co proxecto de innovación en normalización lingüística presentado ao abeiro da convocatoria conxunta da Dirección Xeral de Ordenación Educativa e da Secretaría Xeral de Política Lingüística.
O DOG de hoxe publica os proxectos premiados, xunto ao IES porta da Auga volve a aparecer, tamén por segundo ano consecutivo, o IES Perdouro de Burela. Os únicos premiados da provincia volven a ser dous centros da Mariña Luguesa.
Esta vez o proxecto, baixo o título “Impulso á normalización do galego no sector de servizos xurídicos (notarias, avogacías, xestión de predios,...) e no asociacionismo en xeral do Concello de Ribadeo”, consiste na elaboración en galego de todo tipo de materiais escritos que habitualmente usan eses profesionais: arrendamentos e compravenda de predios rústicos e urbanos, permutas, cesións, doazóns, constitución de sociedades, ... Asemade inclúe a elaboración dun glosario con xiros propios da linguaxe xurídica. Todo o material elaborado incluirase nun CD que se porá a disposición dos interesados.
Tamén, igual que no curso pasado, contaremos coa colaboración do Concello de Ribadeo, a través do seu Servizo de Normalización Lingüística.

Exposición e obradoiro de estampación para 3º de ESO

O venres 19 de outubro os cursos de 3ºESO tiveron o privilexio de asistir a unha exposición de gravados na Oficina de Información ao Consumidor, organizada por Cajastur e o Concello de Ribadeo. Unha profesional do medio se encargou de explicar os pormenores da técnica da litografía, usando como exemplos as propias estampas da exposición.
Como colofón da xornada, o espacio expositivo se convertíu nun taller de iniciación ao gravado e os alumnos e alumnas experimentaron a talla sobre o soporte máis inusual: gomas de borrar. Foi unha boa iniciativa que, esperemos, se repita próximamente.

Especial sobre o IES Porta da Auga na Voz de Galicia

Na edición local da Mariña do 27 de setembro o xornal “La Voz de Galicia” publica un especial de tres páxinas sobre o IES Porta da Auga no que se da un repaso á oferta educativa do Instituto, destácanse algunhas das innovacións tecnolóxicas incorporadas nos últimos anos, como o SGDWEB e SGDSMS, a dotación de novos medios nas aulas e a páxina web do centro. Tamén se subliñan algunhas das actividades máis destacables que se veñen realizando nos últimos cursos: feira das ciencia, revista XERFA, intercambios escolares, ...

XV Encontros Pedagóxicos da Mariña Luguesa

O IES Porta da Auga acollerá, dende o luns 24 ao xoves 27, os XV Encontros Pedagóxicos da Mariña Luguesa.
A recepción de participantes será o luns 24 ás 16:00 e a continuación terá lugar a charla inaugural a cargo de Xosé Manuel Rosales, membro do Colexio Oficial de Arquitectos de Galicia, que presentará o proxecto Terra.
Nas tardes do luns ao xoves desenvolveranse obradoiros sobre convivencia escolar, cultura tradicional e novas tecnoloxías.
O programa complétase coa presentación do “Proxecto para o fomento do uso do galego” do IES de Alfoz, unha visita cultural ao entorno da Ría de Ribadeo e a conferencia de clausura que pronunciará o presidente da Mesa pola Normalización Lingüística, Carlos Callón Torres, sobre “A situación lingüística nos centros de ensino de Galiza. Novas perspectivas”.

Comeza un novo curso.

Hoxe as aulas do instituto abríronse de novo para recibir aos alumnos e alumnas que inician un novo curso escolar non exento de novidades, especialmente as que se derivan da implantación da LOE nos cursos de 1º e 3º de ESO, como a impartición das materias novas “Proxecto interdisciplinar” en 1º de ESO e “Taller de iniciativas emprendedoras” en 3º de ESO, (a polémica “Educación para a cidadanía” terá que esperar ao próximo curso), a modificación dos currículos das demais materias e a aplicación de novos criterios de promoción, titulación e repetición na ESO.
Ademais o instituto impartirá por primeira vez un programa de diversificación curricular de dous cursos, 3º e 4º de ESO. Tendo en conta que en 1º e 2º xa funcionan sendos agrupamentos específicos, as medidas de atención á diversidade abarcan a etapa completa da ESO.
Outra novidade, esta relacionada coa dotación de material do instituto, é a instalación de videoproxectores en nove aulas mais, que se veñen a sumar ás xa existentes para completar un 90% das aulas do centro equipadas con medios audiovisuais (televisión, DVD e videoproxector). Isto, unido á cobertura que proporciona a rede WIFI, que posibilita o acceso inalámbrico a internet en tódalas dependencias do centro, pretende ser o punto de partida para a progresiva incorporación das novas tecnoloxías á aula.
Doutros acontecementos previsibles, como a reforma de instalacións do IES e construción do novo CIFP, iremos informando a medida que haxa datos fiables.
En canto ao número de matriculados neste novo curso, globalmente non hai diferenzas significativas, se ben se produciu unha lixeira diminución na ESO que se compensa cun incremento nos Bacharelatos e Ciclos Formativos da familia de Administración. En total a matrícula vaise aproximar aos 250 alumnos.

Artigos de XERFA no xornal educativo

O xornal educativo da Consellería de Educación seleccionou cinco artigos publicados no nº 15 da revista XERFA, correspondente ao curso 2005-06, para incluír na súa última edición de setembro de 2007.

É a segunda vez que se elixen contidos deste instituto no xornal educativo; a edición deste xornal de xaneiro de 2006 xa recolle a sección completa que a páxina web do departamento de matemáticas (http://www.demates.es/) dedica a Pitágoras.

Os artigos seleccionados nesta ocasión son:

• Entrevista a Daniel Río Rubal “Caxigueiro”.
  Ananda Río e Boris Rodríguez, 4º de ESO, curso 2005-06.
• Inmigración, un problema de todos.
  Alumnado de 4º de ESO, curso 2005-06.
• O impacto ambiental.
  Eloy Rodil e Lorena González, 4º de ESO, curso 2005-06
• O abandono de animais.
  Raquel García Iglesias, 4º ESO, curso 2005-06.
• O Racismo
  Ananda Río, 4º ESO, curso 2005-06.

Recoñecemento aos mellores estudantes de Galicia

O acto de recoñecemento aos estudantes de Ensino Medio de Galicia que acadaron unha puntuación de nove ou superior na cualificación definitiva das Probas de Acceso á Universidade tivo lugar no Salón de Actos da Facultade de Medicina. Estivo presidido polo Reitor da Universidade de Santiago e asistiu, entre outras autoridades, o Alcalde de Santiago de Compostela.
Alí, entre os mellores estudantes de todo Galicia, estivo Joaquín Río Barrera.
As fotos do acto pódense ver na páxina do programa “A Ponte entre o Ensino Medio e a Universidade de Santiago de Compostela”.

Un traballo ben feito.

No salón de plenos do Concello de Ribadeo tivo lugar o acto que pon remate ao proxecto de dinamización da hostalería local, que baixo o lema “Ribadeo, con moito gusto na túa lingua” desenvolveuse coa colaboración do IES Porta da Auga, do Concello de Ribadeo, da Dirección Xeral de Turismo e dos hostaleiros que se adheriron á campaña, un total de 34 establecementos.
Falaron o alcalde de Ribadeo, o director do IES Porta da Auga e o coordinador do proxecto. Os tres destacaron o interese do mesmo e dos resultados acadados, para rematar co merecido recoñecemento e agradecemento por un traballo ben feito a alumnado, profesorado e demais persoas participantes.
Ao final entregáronse as cartas, salvamanteis e demais materiais traducidos a catro linguas (galego, español, inglés e francés) aos hostaleiros asistentes.
O día 14 de decembro de 2006 publicábase neste blog o comezo deste proxecto, premiado pola Dirección Xeral de Ordenación e Innovación Educativa e a Secreataría Xeral de Política Lingüística, e augurábase un longo traballo para a súa realización. Efectivamente foi así, houbo que traballar duro e con coordinación para que hoxe fose posible dispor de todos os materiais traducidos e impresos cun deseño e soporte de calidade. Os nosos alumnos, alumnas, profesores e profesoras participantes teñen gran parte deste mérito.

Un alumno exemplar

A edición local do xornal “El Progreso. A Mariña” dedica unha páxina ao noso alumno de 2º de bacharelato de tecnoloxía, Joaquín Río Barrera. O motivo é a nota que obtivo no exame de acceso á Universidade, nada mais e nada menos que un nove, a máis alta do centro, aínda que as houbo moi próximas; como el di “foi unha clase con moito nivel”.

100% de aprobados na selectividade

Un ano máis, e xa van tres consecutivos, temos un pleno no número de alumnos aprobados nas PAU.
Presentábanse oito alumnos do Bacharelato de Tecnoloxía e cinco do de Humanidades e Ciencias Sociais. As cualificacións definitivas da proba de acceso acadan a media de 7,33, sendo un nove, obtido por Joaquín Río Barrera, a máis alta. En definitiva, son uns excelentes resultados. Parabéns a todos os alumnos e alumnas!.

Programa europeo ADVO. ITALIA 2

As alumnas do ciclo superior de administración e finanzas, Yésica Álvarez González e Carmen Villar Fernñández, regresaron de Italia despois de permanecer alí durante un mes realizando parte da súa formación en centros de traballo (FCT), desempeñando funcións propias dun administrativo.
Esta actividade enmárcase no programa europeo “Avd.Italia 2” no que, ademais do IES Porta da Auga, participan os socios: C.F.P. San Luigi, Fondiaria SAI e Agenzia AXA, ubicados na localidade de San Doná di Piave, próxima a Venecia.
Este programa, coordinado pola profesora Margarita Vilaseca, ten como obxectivo abrirlles aos alumnos as portas a outras experiencias de formación no mercado laboral da Unión Europea.

Excursión de fin de curso a Mallorca

Os alumnos e alumnas de 4º de ESO marcharon de excursión de fin de curso a Mallorca acompañados polas profesoras Isabel López e Eva Méndez. Unha semana de merecidas vacacións despois dun intenso curso, unha guinda final ao remate da etapa educativa.
Na viaxe, ademais de dispoñer de tempo libre, realizarán visitas turísticas pola illa e pola cidade de Palma, coñecerán as Covas do Drach e o castelo de Belver e disfrutarán no parque acuático “Aqualand”.
O regreso está previsto para o xoves 28.

Charla sobre educación sexual

Cristobal Rodríguez Garfia, médico ginecólogo, estivo no instituto para impartir unha charla sobre saúde sexual ao alumnado de 3º de ESO.
Non é primeira vez que contamos coa presenza deste recoñecido especialista, que sempre se ofrece a estar con nós para contribuír á educación sexual do alumnado do instituto.
Esta actividade está programada para incidir, despois de tratar o tema na clase de bioloxía, nas boas prácticas sexuais e no repaso ás problemáticas que poden xurdir por mor do descoñecemento.
A charla prolongouse por un tempo de hora e media no salón de actos do instituto.

Recital poético

Os alumnos e alumnas de 4º de ESO dirixidos por Eva Méndez, profesora de Galego, prepararon un recital de poesía tomando como tema a violencia de xénero, baixo o título “Implícate. Non á violencia de xénero”. Tivo lugar a continuación da conferencia sobre o mesmo tema de Olga Castro.
As poesías foron soando en boca dos alumnos ao mesmo tempo que se proxectaban imaxes e se escoitaba música, configurando en conxunto un ambiente que invitaba á reflexión.
Escolléronse textos de Rosalía de Castro, María Mariño, María Reimóndez, Olga Castro, Lupe Gómez, Marta Dacosta, Manuel Rivas, Fran Alonso, Marica Campo, Ana Romaní, Estíbalez Espinosa, Carlos Negro, Yolanda Castaño, Lucía Novás, María Lado, Antonio López (“El Moreno”), Erika Almenara, Emilce Strucchi, Juan de Dios Peza, Marina Llopis, Medos Romero e das alumnas Raquel Barbeito e Carla Pérez.
O punto final ao recital púxoo a alumna de 4º de ESO, Andrea Martínez, interpretando de forma maxistral “Negra Sombra”.
Cos calorosos aplausos dos asistentes recoñeceuse un traballo ben feito.

(Ver textos)

Conferencia sobre violencia de xénero

No auditorio municipal Hernán Naval tivo lugar unha conferencia sobre violencia de xénero impartida por Olga Castro, licenciada en Ciencias de Comunicación e Tradución e Interpretación, e organizada pola profesora de Galego, Eva Méndez, xunto cos alumnos e alumnas de 4º de ESO.
A conferencia, á que asistiu a totalidade do alumnado do centro, non se limitou a unha charla sobre o tema central, senón que ao mesmo tempo e para captar a atención e acadar unha maior concienciación do alumnado, escenificáronse distintos exemplos e víronse imaxes e vídeos.
Ademais de facer un repaso minucioso a estatísticas, tipos, causas e consecuencias, incidiuse especialmente na detención precoz, dende o noivado, do posible maltratador. A importancia de non pasar por alto algunhas das sinais de alerta quedou de manifesto con exemplos reais escenificados polos alumnos e alumnas de 4º de ESO.
Ao remate da charla abriuse un turno de preguntas que resultou moi interesante, non só pola cantidade das mesmas, senón tamén polo debate que suscitaron.
Á conferencia seguiulle un recital de poesía organizado tamén polo alumnado de 4º de ESO sobre o mesmo tema.

Presentación oficial da páxina web e do nº 16 de revista XERFA

A páxina web do IES Porta da Auga, na que levamos traballando tres anos, presentouse oficialmente nun acto que tivo lugar onte ás 11:00 h no salón de actos do instituto. A prensa recolle a nova nas edicións locais da Mariña.
Na presentación o director explicou os obxectivos desta web:

• Ofrecer á comunidade educativa un servizo de información e comunicación permanente e actualizada aproveitando ao máximo as posibilidades que as novas tecnoloxías nos ofrecen.
• Crear unha plataforma de apoio didáctico ao alumnado posibilitando os múltiples usos didácticos da web dende os departamentos.
• Dar a coñecer a realidade do centro. Abrir as súas portas e mostrar como é (instalacións), que se estudia (oferta educativa), que se fai (actividades), como se organiza...

No mesmo acto, Vanessa Gromaz e Boris Rodríguez, alumnos de 1º de bacharelato de humanidades e ciencias sociais, presentaron o número 16 da revista XERFA. Con el xa son 17 cursos académicos consecutivos nos que non falta a presenza da nosa revista, xa incluída na exposición de prensa escolar que mostra o MUPEGA (Museo Pedagóxico de Galicia).
Revista XERFA e páxina WEB, dous expoñentes deste instituto, dous froitos do traballo de alumnado e profesorado dos que nos sentimos moi orgullosos. Noraboa a todos/as os que os fan posible.

O nº 16 da revista XERFA xa é unha realidade

Dende hoxe mesmo pode lerse o nº16 da revista XERFA, ben en papel ou na edición dixital.

Neste número participaron sete profesores e trinta alumnos para completar un total de 12 artigos, catro entrevistas, un comic e pasatempos.

O sumario da revista é o seguinte:

• Editorial
• Viaxe a Medrid
• Exposición de enerxías renovables
• Feira da ciencia e tecnoloxía 2007
• Proxecto de normalización lingüística
• Traballar en colaboración no ámbito da educación
• Coéte na feira da ciencia do 2000
• www.portadaauga.es
• Humor tecnolóxico
• Letras gelegas
• Críticas literarias
• Entrevista a Ugia Pedreira
• Entrevista a Andrea Méndez Álvarez
• Entrevista a Ana Varela Rey
• Entrevista a E. Balbino Pérez Vacas
• Certama narrativa "El Viejo Pancho"
• Cómic
• Pasatempos
  

Charla sobre drogodependencia en 4º de ESO.

Hoxe, Mónica, a traballadora social do concello, falounos sobre as drogas. Primeiro comezamos reflexionando entre todas as definicións de drogas; chegamos á conclusión de que se poden definir como substancias que ao ser inxeridas provocan adición e tolerancia.
Logo clasificamos as bebidas alcólicas en dous grupos, dependendo do proceso de fabricación: destiladas ou fermentadas, poñendo varios exemplos de cada un dos tipos. Falamos do alcol e dos seus efectos sobre o organismo.
A continuación falamos do hachis e dos efectos que produce sobre o corpo, como poden ser a sensación de excitación e a fase depresiva que a segue. Tamén nos deu algúns datos interesantes como, por exemplo, que o hachis non crea adición física e que axuda a desenvolver enfermidades do xénero das psicoses.
Rematou a charla pedíndonos que escribíramos nun folio anónimo a definición de droga coas nosas palabras e a nosa opinión persoal sobre as drogas.

Martín González Vilaseca

María Vietes Díaz

Excursión a Oviedo

Pola mañá aproveitamos para dirixirnos ao Naranco e visitar os dous monumentos máis emblemático da arte asturiana: Sta. María do Naranco e S.Miguel. As explicación do guía que nos acompañou axudáronos a entender mellor estes dous monumentos.

Aínda que xa tiñamos bastante fame, pois xa se nos fixera algo tarde, aproveitamos para facer un pequeno percorrido pola parte histórico-artística de Oviedo e saber algo máis da fermosa cidade. A tarde aínda nos esperaba outra fermosa sorpresa, a obra de teatro que a todos nos maravillou.

EXCURSIÓN TEATRAL A VETUSTA

El gran secreto
Els Comediants
Teatro Campoamor
Oviedo

No habrá paraíso ni amores deshojados …
Poeta en Nueva York
Federico García Lorca

Alumnos de 4º de ESO y de Bachillerato, acompañados de cuatro profesores, asistieron a la representación de El gran secreto del grupo catalán Els Comediants en el Teatro Campoamor de Oviedo.

La obra repasa la historia de las relaciones amorosas a través de los tiempos. Ante el espectador, y en sucesivas escenas, van desfilando cuadros de amor, desde que una intempestiva manzana marcó el fin de la inocencia hasta nuestros días: amor primitivo, amor cortés, amor naturalista, y otros modos arquetípicos de amor se suceden ante los ojos cómplices de los espectadores.
Alumnos y profesores disfrutaron con la obra y tuvieron ocasión de apreciar un moderno montaje en el incomparable marco del teatro vetustense.

QUE COUSA É?

Esta é a pregunta pola que comezan ou pola que rematan centos de adiviñas.

"EN BOCA PECHADA NON ENTRAN MOSCAS" é un vello refrán dos moitos que coñecemos. Os refráns son moi expresivos, tanto que moitas veces botamos man deles para explicar as nosas intencións, máis acertadamente que coas nosas propias palabras.

Adiviñas e refráns forman parte dunha rica cultura popular.

Acertar adiviñas e saber completar refráns foi unha actividade interactiva que por primeira vez puxeron en práctica os alumnos de 5º e 6º de primaria do CEIP Gregorio Sanz e os alumnos de 1º E.S.O. do IES Porta da Auga.

A idea partiu do Equipo de Normalización Lingüística do Gregorio Sanz, que nos elixiron para concursar con eles.

Cada equipo levaba preparadas dez adiviñas e cinco refráns.

Grazas a Internet, a actividade foi simultánea. No salón de actos do instituto precisamos un ordenador conectado a internet, unha cámara web e proxectamos a imaxe nunha pantalla grande. Así os alumnos do IES podían ver e escoitar aos alumnos do CEIP que no mesmo momento estaban na súa biblioteca, e viceversa.

Despois de saudárense, comezaron os de primaria cunha adiviña, que os de ESO tiñan que acertar, e así alternativamente. Logo chegou o turno dos refráns. Cada equipo comezaba cun refrán, e o equipo contrario debía rematalo correctamente.

Ao final, despedíronse cordialmente, sen ter en conta que tiveron máis acertos os alumnos de primaria.

Excursión a Vigo, SªTegra e Valença

O pasado sábado 12 de maio os alumnos e alumnas participantes no proxecto GALEGUIZACIÓN DA HOSTELARÍA RIBADENSE disfrutaron do seu merecido premio: unha viaxe lúdica a Vigo, Sta. Tegra e Valença.

A saída tivo lugar ás 8:00 h., chegando a Vigo ás 12:00. As catro horas que estivemos nesa cidade deron para visitar o mirador do Castro -con fermosas vistas da urbe e da súa ría-, dar un paseo pola céntrica rúa peonil do Príncipe, polo bairro da Pedra e pola zona portuaria, á parte, loxicamente, da necesaria reposición de forzas co xantar de mediodía.

A continuación dirixímonos directamente para o monte de Sta. Tegra. Alí contemplamos a fermosísima vista do esteiro da desembocadura do rio pai, o Miño, e visitamos tamén o castro, un dos máis coñecidos.

De seguido saimos cara a vila-fortaleza de Valença do Minho, ao outro lado do río. Puidemos pasear paseo por esta bonita e moi concurrida vila comercial portuguesa e, o que máis e o que menos, aproveitou para realizar algunhas compras.

As 19:30 iniciamos o regreso, estando de volta no IES ás 23:30 segundo o previsto.

Cabe recordar que o proxecto arriba mencionado foi un dos premiados dentro da convocatoria para proxectos de innovación lingüística en centros públicos. O traballo posterior consistíu na tradución ao galego, inglés e francés dos menús da hostelaría local. O Concello de Ribadeo, mediante a Área de Desenvolvemento Local, encargouse do contacto cos establecementos interesados, así como de conseguir a financiación para poder presentar uns materiais atractivos listos para o seu uso e en catro linguas as tres citadas e o español-. Os materiais desta campaña están a punto de ser presentados publicamente baixo o suxerente título RIBADEO CON GUSTO, campaña de dinamización da hostelaría local.

Obra de teatro ZARDIGOT

O venres 11 de maio os rapaces e rapazas de 3º e 4º da ESO foron ver ao auditorio de Ribadeo á representación da obra de teatro do autor Euloxio Ruibal titulada Zardigot.

Os actores co seu bo facer souberon achegarnos, mediante esta traxedia de estilo clásico, ao desolador mundo da guerra no que xermola o peor do ser humano: a violencia, a barbarie e a crueladade infinita que non provocan máis que dor, sufrimento, aellamento e ata a desesperación absoluta. Ante tal panorama é difícil permanecer indiferente e no espectador queda, cando menos, o sabor agre de ter presenciado o inferno pero tamén flúe o desexo positivo e a esperanza de que iso non volva suceder en ningún lugar do mundo e a convicción de que se logrará comezando pola propia achega persoal de cada un de nós.

Quedamos coa grata sensación de que Zardigot deixou a súa impronta nos rapaces e rapazas e de que o contacto co teatro aporta enriquecedoras aprendizaxes fóra da aula.

Correlingua 2007

"GALEGANDO" é o lema que acompaña o Correlingua 2007.

O luns 7 de maio celebrouse o da Mariña. Este ano no concello de Viveiro.

Os alumnos do noso centro que participaron nesta actividade son de 3º e 4º E.S.O. e 1º de Bacharelato. O desenvolvemento do programa levouse a cabo do seguinte xeito: antes de saír repartiuse a cada alumno unha camiseta e unha chapa co lema do Correlingua inscrito. Ás 11:00 h. chegamos a Viveiro, e a xuntanza cos alumnos dos demais centros da Mariña tivo lugar ao lado de Pavillón Municipal, no parque de Covas. Enseguida comezou o percorrido pola vila, presidido por unha pancarta que reclamaba a potenciación do uso do galego para calquera ámbito. O percorrido seguiu este itinerario: Paseo Marítimo (Avda. de Martín Ledesma); variante, cruzando a ría; Avda. de Ferrol; Praza de Lugo; entrada no casco histórico pola Porta da Vila; rúa Pastor Díaz; Praza Maior e variante. Ao lado da variante tiveron lugar os actos (non puido ser na Praza Maior, como estaba previsto, por motivos de espazo). Comezaron ás 12:00 h. Unha alumna e un alumno, ambos do instituto de Viveiro, leron o manifesto "NINGUÉN NOS CALA". Nel facíase unha chamada de atención ás grandes empresas (de telefonía, cine...) para que contaran coa nosa lingua galega nos seus usos. Logo actuou un grupo de alumnas e alumnos de CEP Lois Tobío, dirixidos polo seu profesor de música, Manuel Rodríguez. Cantaron e tocaron, cos instrumentos que eles mesmos fixeron, dúas pezas medievais. A continuación actuou o grupo CHÉVERE e o XABARÍN CLUB da TVG. Ás 13:00h. remataron os actos coa actuación dun grupo de alumnos e despedida aos participantes.

O IES, amosando a ciencia na rúa.

O sábado 5 de maio foi o “día de la ciencia en la calle” de A Coruña. Alí foi unha representación do IES, invitada como tódolos anos polos amigos da Casa das Ciencias, a amosar algunhas das montaxes da feira. Aló estiveron tanto os líquidos non newtonianos (auga e maicena) como a mostra de plegamentos que pode ter a cortiza terrestre, ou dos tecidos hidrófugos, xunto coa idade dos peixes, á vista das escamas. Tanto os dermatoglifos como o fume caínte que se facía visible nunha montaxe, ou os globos que ”incomprensiblemente” non estoupan ó ser perforados de xeito conveniente acapararon a atención dos visitantes.
A carpa do IES recibiu moita xente; en momentos, abonda máis da que podiamos atender. Por ela pasaron tanto xente curiosa como alumnos e profesores doutros centros, algúns aínda adestrados pola nosa xente para que puideran facer eles mesmos algunha explicación ou reproducir algunha experiencia sinxela: temos fotos dos globos atendidos por xente de fóra... Pero tamén pasaron VIP: á primeira hora da mañá, o Director da Casa das Ciencias pasou co equipo coordinador a botar unha ollada, e máis tarde, foi el mesmo quen trouxo á carpa ó alcalde de A Coruña a ver as curiosas propiedades da maicena...
Por suposto, tamén pasou a tele, a radio, a prensa, ... pero o máis importante foi que a xente que fomos non o pasamos nada mal, ó tempo que ensinábamos ciencia e aprendíamos doutros (pois había alí máis de 20 centros educativos e outras entidades). Asemade, algúns estableceron contactos de diversos tipos, e ata tivemos un agasallo dun visitante a unha hora de pouca afluencia: un malabarista deunos unha demostración asombrosa das súas habilidades, en sesión expresa para os que estabamos naquel momento na carpa. Tivemos visita de portugueses (hai fotos enviadas por eles) e de universitarios, e como tódolos anos, a xente da organización tamén fixo visitas para disfrutar e aprender connosco nunha xornada na que ata acompañou o tempo, lucindo o sol con algunha nube sen atosigar.
Tamén houbo anécdotas, pero esas xa son máis persoais...